Հասարակություն
Գերմանիան ունի ավելի քան 80 միլիոն բնակչություն և բնակչության բավականին բարձր խտություն։ Այստեղ գոյություն ունեն համակեցության բազմազան ձևեր․ ամուսնացած և չամուսնացած զույգեր՝ երեխաներով կամ առանց երեխաների, նույնասեռ զուգընկերներ, ամուսնալուծված անձինք, միայնակ ծնողներ և միայնակ տնային տնտեսություններ։
Հասարակության կարևոր նպատակներից մեկը ներառականությունն է, որի նպատակն է ապահովել, որ բոլոր մարդիկ՝ անկախ ֆիզիկական սահմանափակումներից, սեռական կողմնորոշումից, էթնիկ ծագումից և այլ հանգամանքներից, հավասար իրավունքներով մասնակցեն հասարակական կյանքին։
Պետություն և քաղաքականություն
Գերմանիան դաշնային պետություն է, որը բաղկացած է 16 դաշնային երկրամասերից։ Սա նշանակում է, որ քաղաքական որոշ ոլորտներում դրանք ունեն ինքնուրույն լիազորություններ։ Մինչ դաշնային կառավարությունը պատասխանատու է, օրինակ, արտաքին քաղաքականության, պաշտպանության և անձնագրային հարցերի համար, դաշնային երկրները ղեկավարում են կրթության և մշակույթի ոլորտները։
Միևնույն ժամանակ Գերմանիան խորհրդարանական ժողովրդավարություն է։ Դրա հիմքում պարբերաբար անցկացվող ընտրություններն են, որոնց միջոցով ընտրվում են ժողովրդի ներկայացուցիչները։ 18 տարին լրացած յուրաքանչյուր Գերմանիայի քաղաքացի ունի ընտրելու իրավունք, իսկ ԵՄ քաղաքացիները կարող են մասնակցել տեղական ինքնակառավարման ընտրություններին։
Աշխարհագրություն և կլիմա
Գերմանիայի բնությունը շատ բազմազան է․ հյուսիսում՝ Հյուսիսային և Բալթիկ ծովերը, հարավում՝ Ալպերը, իսկ դրանց միջև՝ մեծ ու փոքր անտառներ, լճեր, գետահովիտներ և միջին բարձրության լեռնաշղթաներ։ Բեռլինը՝ մոտ 3,4 միլիոն բնակչությամբ, երկրի ամենամեծ քաղաքն է, սակայն կան նաև մի քանի մետրոպոլիտենային շրջաններ, որտեղ մի քանի քաղաքներ միասին կազմում են խոշոր բնակավայրեր։
Կլիման բարեխառն է։ Ձմռանը միջին ջերմաստիճանը կազմում է մոտ 0–5°C, իսկ ամռանը՝ 17–23°C։ Հյուսիսում կլիման ավելի մեղմ է, մինչդեռ հարավ-արևմուտքում և Ռայն գետի շրջանում՝ ավելի տաք, իսկ հարավ-արևելքում և լեռնային շրջաններում՝ ավելի սառը։ Տեղումները լինում են ամբողջ տարվա ընթացքում, իսկ ձմռանը բարձրադիր վայրերում հաճախ դիտվում են ձյան տեսքով։ Ձմեռները հաճախ մառախլապատ և ցուրտ են, իսկ ամառները համարվում են ավելի խոնավ, սակայն լինում են նաև արևոտ և երբեմն շոգ օրեր։
Օրվա տևողությունը տարվա ընթացքում զգալիորեն տարբերվում է․ դեկտեմբերին՝ տարվա ամենակարճ օրը, լուսավոր է մոտավորապես ժամը 08։00-ից մինչև 16։00-ը, իսկ հունիսին և հուլիսին արևը ծագում է մոտ ժամը 05։00-ին և մայր մտնում միայն մոտ ժամը 22։00-ին։
Կրոն
Կրոնի ազատությունը ամրագրված է Գերմանիայի Սահմանադրությամբ (Հիմնական օրենքով)։ Սա նշանակում է, որ յուրաքանչյուր քաղաքացի ազատ է որոշելու՝ պատկանել որևէ կրոնի, թե ոչ, և ազատ է իր կրոնը դավանելու, քանի դեռ դրանով չեն խախտվում այլոց հիմնարար իրավունքները։
Բնակչության մոտ 60%-ը քրիստոնյաներ են՝ ավետարանական կամ կաթոլիկ եկեղեցու հետևորդներ, սակայն Գերմանիայում ներկայացված են նաև բազմաթիվ այլ կրոններ և աշխարհայացքներ։ Բնակչության մոտ 30%-ը կրոնական պատկանելություն չունի։
Տրանսպորտ և ենթակառուցվածքներ
Գերմանիան խիտ բնակեցված երկիր է և ունի զարգացած ճանապարհային ու երկաթուղային ցանց։ Ավտոմեքենայով տեղաշարժը բավականին հարմար է․ մայրուղիների, դաշնային և տարածաշրջանային ճանապարհների միջոցով հնարավոր է արագ հասնել տարբեր քաղաքներ։ Տնային տնտեսությունների մոտ երեք քառորդն ունի առնվազն մեկ ավտոմեքենա։ Մայրուղիներում ընդհանուր արագության սահմանափակում սովորաբար չկա, ինչպես նաև ճանապարհային վճար (մաքս) չի գործում։ Սակայն խիտ երթևեկության և շինարարական աշխատանքների պատճառով հաճախ առաջանում են խցանումներ, հատկապես օրվա պիկ ժամերին։
Խոշոր քաղաքների միջև ճանապարհորդելու համար հաճախ հարմար են Գերմանիայի երկաթուղու (Deutsche Bahn) հեռավոր և տարածքային գնացքները կամ մասնավոր փոխադրողները։ Չնայած դրան՝ երբեմն պետք է հաշվի առնել ուշացումները։ Քաղաքների ներսում առավել հարմար են հեծանիվը, ավտոբուսները, տրամվայները և մերձքաղաքային էլեկտրագնացքը։ Հանրային տրանսպորտը քաղաքներում շատ լավ զարգացած է, իսկ գյուղական շրջաններում՝ տարբեր մակարդակով։ Տոմսերը սովորաբար կարելի է գնել առցանց կամ կանգառներում տեղադրված ավտոմատներից։ Տրամվայներում հաճախ կան ավտոմատներ, իսկ ավտոբուսներում տոմսը կարելի է գնել վարորդից։ Երեխաները, աշակերտները, ուսանողները, աշկերտները մասնագիտական ուսուցում ստացող անձինք, ինչպես նաև տարեցները օգտվում են զեղչերից։
InterCity (IC) և InterCityExpress (ICE) գնացքներով երկար ուղևորությունները սովորաբար ավելի թանկ են, սակայն նախապես ամրագրելու դեպքում հաճախ հնարավոր է ձեռք բերել ավելի մատչելի տոմսեր։ Որոշ դեպքերում շաբաթօրյա կամ օրական տոմսերը, որոնք գործում են ամբողջ դաշնային երկրում՝ տարածաշրջանային երթևեկության համար, կարող են լինել ավելի շահավետ։
Հեծանիվ վարելու համար, հատկապես քաղաքներում, կան հատուկ նշված հեծանվուղիներ, ինչպես նաև ընդհանուր առմամբ լայն ցանցով գեղեցիկ հեծանվային ճանապարհներ։ Գերմանական հեծանվային ակումբը (ADFC) յուրաքանչյուր երկու տարին մեկ անցկացնում է «Հեծանվային կլիմայի թեստ», և 2018 թվականին Բրեմենը, Կարլսրուեն և Գյոթինգենը առանձնացել են բարձր արդյունքներով։
Ինտերնետային ենթակառուցվածքները տարբեր տարածաշրջաններում զարգացած են տարբեր աստիճանով․ մեծ քաղաքներում և խոշոր բնակավայրերում հասանելի է արագ կապ և լավ ցանցածածկույթ, մինչդեռ գյուղական շրջաններում ինտերնետը հաճախ ավելի դանդաղ է, և հանդիպում են նաև կապի բացակայության գոտիներ։